काठमाडौ, भदौं ३० । चौंथो सिक्वेल कबड्डीको अन्तिम सिरिज हुने घोषणा यसका निर्माताले गरेका छन् । सोमबार राजधानीमा आयोजित पत्रकार सम्मेलनमा निर्माता एवं निर्देशक रामबाबु गुरुङले चौंथो संस्करणमा फिल्म टुंगिने बताए ।
‘हुन त दोस्रो सिक्वेललाई नै अन्तिम बनाउने भनेको हो उनले भने, काम गर्दै जाँदा तेस्रो पनि बन्यो । आगामी शुक्रबार रिलिज हुन लागेको तेस्रो सिक्वेलबारे गुरुङ मिडियासँग भलाकुसारी गर्दै थिए ।
चलचित्र समिक्षकहरुले बारम्बार असन्तुष्टि पोख्दै आएजस्तो सामाजिक प्रक्रियाको चित्रणमा आफूहरु सचेत रहेको पनि गुरुङले बताए । काजी अर्थात दयाहाङ राई यसमा प्रेमबाट फ्रस्टेट पात्र देखिन्छ । ऊ यसमा लाउड पनि छैन उनी भन्छन मैंया र काजीको प्रेम कता मोडिन्छ, यसबारे थाहा पाउन पनि फिल्म नै हेर्नुपर्छ ।
विल्सविक्रम राई कबड्डी तीनमा काजीको समानान्तर पात्रको चरित्र चित्रणमा छन् । उनलाई यसमा भिलेन अथवा हिरो पनि भन्न सकिन्छ । सुटिङ सेटदेखि नै आफूलाई रमाइलो अनुभव भएको बताउँदै विल्सनले कमेडी पाराले गम्भिर प्रेमलाई चित्रण गरिएको बताए ।
उपासनासिंह ठकुरीका लागि कबड्डी ३ दोस्रो फिल्म हो । पहिलो फिल्म क्याप्टेनमा अनमोल केसीबाट धेरै कुरा जानेको बताउने ठकुरीले गार्जियनको रुपमा दयाहाङ र विजय बरालले आफूलाई राम्रो कोचिङ गरेको अनुभव सुनाइन् ।
फिल्ममा उनी दयाहाङ, विल्सनविक्रम र कर्मको लभ इस्ट्रेस्टको भूमिकामा प्रस्तुत भएकी छन् । सिनेमा नेपालले निर्माण गरेको कबड्डी कबड्डी कबड्डी असोज ३ गते देशव्यापी प्रदर्शन हुँदैछ ।
प्रतिक्रिया लेख्नुहोस्:-