चन्द्रसूर्य फाउण्डेशनले विद्यार्थी र सिनियरहरुको नि:शुल्क ट्याक्स भरिदिने

डेविस, क्यालिफोर्निया
जनवरी ७
सामाजिक कार्यको लागि स्थापना गरिएको चन्द्र एण्ड सूर्य फाउण्डेशनले सन् २०२३ का लागि पूर्णकालीन विद्यार्थी र सिनियर सिटिजन्सको नि:शुल्क ट्याक्स भरिदिने घोषणा गरेको छ ।
फाउण्डेशनका संस्थापक एवं एसस्वाएर ईंकका प्रमुख सन्तोष साहले एक सूचना जारी गर्दै सो घोषणा गरेका हुन् । फाउण्डेशनले सन २०२१ र २०२२ मा झण्डै ४ सयको हाराहारीका विद्यार्थी एवं सिनियर सिटिजन्सहरुको निशुल्क ट्याक्स विवरण भरिदिएको थियो । नेपाली समुदायको सामाजिक कार्यमा निकै लोकप्रिय रहेका साह ट्याक्स विज्ञको रुपमा परिचित छन् ।
साहले दिएका जानकारी अनुसार सो सुविधा प्राप्त गर्न नेपाली मुलका पूर्णकालीन बिद्यार्थी हुनुपर्ने र उनीहरुको आम्दानी ३० हजार डलर भन्दा कम हुनुपर्नेछ । सो रकम डब्लु टुमा उल्लेख भएको हुनुपर्नेछ ।
त्यसैगरी सिनियर सिटिजन्सको सहका उनीहरु नेपाली हुनुपर्ने र ६५ वर्ष पुरा गरी ५० हजार भन्दा कम आम्दानी भएको हुनुपर्नेछ । सिनियर सिटिजनको हकमा उनीहरुको आम्दानी सोसल सेक्यूरिटी र रिटायर्डमेण्ट इन्कम हुनुपर्ने फाउण्डेशनले उल्लेख गरेको छ ।
साहले सामाजिक उत्तरदायित्व अन्तरगत फाउण्डेशनको स्थापना भएकोले सामाजिक सेवा आफ्नो कर्तब्य भएको बताए । अमेरिकामा कर तथा आइआरएसका हरेक गतिविधिवारे समुदायलाई जानकारी गराउदै आएका साहले आफूले विद्यार्थी जिवन बिताउदा भोगेको अनुभवका आधारमा विद्यार्थीको र आफ्ना बुवाआमाको प्रेरणाबाट सिनियर सिटिजनहरुको नि:शुल्क ट्याक्स विवरण भरिदिने गरेको दूरवीनलाई बताए । अमेरिकाको जुनसुकै राज्यमा रहेका विद्यार्थी एवं अभिभावकहरुले आगामी मार्च १५ भित्र आफ्नो कम्पनीमा सम्पर्क राख्न पनि उनले अनुरोध गरेका छन् ।