अहिलेको व्यवस्थाले जनताको अवस्थामा सुधार ल्याउन नसकेको कमल थापाको टिप्पणी

काठमाडौं । राप्रपा नेपालका अध्यक्ष कमल थापाले अहिलेको व्यवस्थाले जनताको अवस्थालाई सुधार गर्न नसकेको टिप्पणी गरेका छन् ।

पूर्व उपप्रधानमन्त्री समेत रहेको थापाले मंगलबार महोत्तरीको बर्दिबासमा पार्टीद्वारा आयोजित मधेस प्रदेश स्तरीय प्रशिक्षण कार्यक्रमको उद्घाटन गर्दै यस्तो बताएका हुन् ।

सनातन धर्मसंस्कृति पहिचान सङ्कटमा परेको, मुलुकको आर्थिक अवस्था कमजोर भएको, विदेशी चलखेल र प्रभाव बढेको भन्दै थापाले हिन्दु धर्म माथिको अपमान र थिचोमिचो सहन गर्न नसकिने बिचार व्यक्त गरे ।

धर्म परिवर्तनको डढेलोले सिङ्गो मुलुक आक्रान्त रहेको चर्चा गर्दै थापाले आन्दोलनको निमित्त सम्पूर्ण राष्ट्रबादी, प्रजातन्त्रबादी र देशभक्तहरू एक ठाउँमा आउनुपर्नेमा जोड दिए ।