काठमाडौं । भोलि पुस २७ गते पृथ्वी जयन्तीको अवसरमा पूर्वराजा ज्ञानेन्द्र शाहले पृथ्वीनारायण शाहको शालिकमा माल्यार्पण गर्ने भएका छन्।
सिंहदरबारको मूल गेट अगाडि रहेको पृथ्वीनारायणको शालिकमा पूर्वराजा शाहले माल्यार्पण गर्ने कार्यक्रम रहेको उनका संवाद सचिव फणिराज पाठकले आज विज्ञप्तिमार्फत जानकारी गराएका छन्।
पाठकका अनुसार ज्ञानेन्द्र मंगलबार मध्यान्ह १२–३० बजे पृथ्वीनारायण शाहको शालिकमा माल्यार्पण गर्न जाने कार्यक्रम तय भएको छ।
नेपालमा गणतन्त्र आउनुअगाडिसम्म पृथ्वीजयन्तीमा सरकारले सार्वजनिक बिदा दिने गर्दथ्यो। गणतन्त्र आएपछि भने उक्त बिदा काटिएको थियो।
साथै राष्ट्रिय एकता दिवस मनाउन नेपाल प्रज्ञा–प्रतिष्ठान, नेपाल संगीत तथा नाट्य प्रज्ञा–प्रतिष्ठान, नेपाल ललितकला प्रज्ञा–प्रतिष्ठान र सांस्कृतिक संस्थानका पदाधिकारी सम्मिलित समिति पनि गठन भएको छ। नेपालमा गणतन्त्र आएपछि सिंहदरबारको मूल गेट अगाडि रहेको पृथ्वीनारायणको शालिकमा माल्यार्पणमा अरु सहभागी भए पनि पूर्वराजा स्वयं उपस्थित हुने गरेका थिएनन् ।
यसपाली भने उनी आफैं सहभागी हुनुले उनी गद्यीच्यूत भए पनि नेपालको तरल राजनीतिलाई नियालिरहको प्रस्ट हुन्छ ।
प्रतिक्रिया लेख्नुहोस्:-