नेपाल अमेरिका एकता समाजको अध्यक्षमा रोशन अधिकारी निर्वाचित

लसएन्जल्स । दक्षिण क्यालिफोर्नियामा सक्रिय सामुदायिक संस्था नेपाल अमेरिका एकता समाजको आठौ अध्यक्षमा रोशन अधिकारी निर्वाचित भएका छन् ।
विगत १४ वर्ष देखि लसएन्जल्सलाई कर्म थलो बनाएर काम गरिरहेको यस संस्थाको गत आईतबार श्री पशुपतिनाथ फाउन्डेसनको सभाहलमा सम्पन्न साधारण सभाले आगामी दुई वर्षका लागि अधिकारीलाई अध्यक्षमा चयन गरेको हो ।

संस्थाको विधान बमोजिम गत नोभेम्बरमा गर्नुपर्ने साधारण सभा केही ढिलो गरि भए पनि सम्पन्न गर्न यसअघिको कार्यसमितिले संस्थाका आजीवन सदस्य अग्नि चौलागाईको नेतृत्वमा चन्द्र शिवाकोटी तथा डिल्ली थापा सहितको तीन सदस्यीय निर्वाचन समिति गठन गरेको थियो ।

जम्मा १३ सदस्यीय कार्यसमितिमा आठ जनाले मात्र उम्मेदवारी दिएकाले उनीहरु सबै निर्विरोध निर्वाचित भएको घोषणा गरिएको थियो ।
यसरी निर्विरोध निर्वाचित हुनेहरुमा अर्जुन पौडेल–उपाध्यक्ष, शम्सेर भण्डारी – महासचिव, शिव शिवाकोटी–सचिव, तथा सदस्यहरुमा बबिन थापा , नवराज मुडभरि , विदुर खड्का , मणिराम न्यौपाने र छत्र बहादुर छेत्री रहेका छन् ।

संस्थाको प्रमुख पदहरु मध्ये वरिष्ठ उपाध्यक्ष, कोषाध्यक्ष तथा अन्य सदस्यहरुको पद हाललाई खाली रहेको जानकारी पनि निर्वाचन समितिले दिएको छ ।