स्यानहोजे, क्यालिफोर्निया
सिलीकोन भ्यालीमा सामाजिक सेवामा ख्याती कमाएका नेपाली मुलका बाबुप्रसादले स्यानहोजे सिटी काउन्सिल मेम्वरमा चुनावी प्रतिष्पर्धा गर्दैछन् । अमेरिकाको १० औं ठूलो सिटीको रुपमा रहेको स्यानहोजेको २ नम्वर डिस्ट्रीकवाट सिटी काउन्सिल पदको लागि बाबुप्रसादले आफ्नो उम्मेदवारी दिएका हुन् । सन् २०२४ को नोभेम्वर ५ मा हुने निर्वाचनमा उनले मेक्सिकन मुलमा अमेरिकीसंग चुनावी प्रतिष्पर्धा गर्नेछन् । त्यस अघि उनले आगामी मार्च ५ माहुने प्राइमेरी निर्वाचनमा पनि प्रतिष्पर्धा गर्नुपर्नेछ । सिलिकोन भ्यालीमा रहेका डेमोक्रेटिक पार्टीका कंग्रेसमेन रो खन्ना, सेनेटर डेभ कोट्से लगायत अधिकांश एसेम्ब्ली मेम्वरहरुवाट अनुमोदित भएकाले उनको चुनावी अभियान शसक्त देखिएको छ भने प्रारम्भिक सर्वेक्षणमा उनी निकै अग्रस्थानमा देखिएका छन् । नेपालीहरुको बाक्लो बसाई रहेको बे एरियावाट सिटी काउन्सिलमा प्रतिष्पर्धा गर्ने बाबुप्रसाद पहिलो नेपाली हुन् ।
सन् २००३ मा नेपालवाट अमेरिका आएका बाबुप्रसाद नेवरहूड कम्युनिटी अर्थात आफ्नो टोलछिमेकको नेतृत्व गर्दै अमेरीकाको मुल राजनीतिमा प्रवेश गरेका हुन् । दूरवीनसंग कुराकानी गर्दै बाबुप्रसादले आफ्नो चुनावी अभियानमा सहयोग गर्न बे एरियावासी नेपालीसंग अपिल पनि गरेका छन् । “म जहाँ छु, नेपालको प्रतिनिधित्व गरिरखेको छु, यसकारण मेरो अभियानमा सहयोग गर्न सवै नेपालीसंग अनुरोध गर्दछु,” उनले भने । उनले बे एरियामा बसोवास गर्ने नेपालीहरुलाई फण्ड रेजिंग अभियान अन्तरगत सहयोग गर्न आग्रह गरेका छन् ।
विगतका दिनमा नेपालीहरुले प्रशासनिक झमेला, प्रकृयागत ढिलाई जस्ता समस्यासंग जुध्न परेको र आफ्नो प्रतिनिधित्व नहुदा समस्या खेप्नु परेको दृष्टान्त दिदै अमेरिकामा बसोवास गर्ने नेपालीहरुको संख्या बढिरहेको सन्दर्भमा यहाँको राजनीतिक एवं प्रशासनिक क्षेत्रमा नेपालीहरुको उपस्थिति अनिवार्य रहेको उनले बताए । “म आउदा, यहाँ नेपालीहरु खोज्नुपर्ने अवस्था थियो, अव त हामीहरु धेरै विस्तारित भएका छौ, यसकारण पनि हाम्रो उपस्थिति जरुरी भइसकेको छ”, उनले भने ।
निर्वाचनमा आफ्नो स्पष्ट भिजन भएकोले यहाँका धेरै भन्दा धेरै राजनीतिक ब्यक्तिहरु सामाजिक एवं ब्यावसायिक संघ संस्थावाट अनुमोदन पाएको बाबुप्रसादले बताए । स्यानहोजे सिटी काउन्सिलमा निर्वाचित भएर नेपाल र नेपालीको नाम राख्न आफूले हरतरहले प्रयत्न गर्ने र स्यानहोजे सिटीमा रहेको डिएमभीमा नेपाली भाषाको ड्राइभिंग पुस्तिका राख्ने आफ्नो योजना रहेको बताउदै उनी भन्छन्,- “हामी यो काम सजिलै गर्न सक्छौं “।
उनले स्यानहोजेमा रहेको होमलेस समस्याको दीर्घकालीन समाधान, एफोर्डेवल हाउजिंग, सुलभ शिक्षा र रोजगार एवं सामाजिक सुरक्षालाई निर्वाचनको आफ्नो प्रमुख मुद्धा बनाएका छन् । उनको चुनावी अभियानलाई स्थानीयहरुले निकै चासोका साथ सघाएका छन् । निर्वाचन अभियान अन्तरगत आगामी शनिवार स्यानहोजेमा बिहान ११ बजेदेखि अपरान्ह १ बजेसम्म फण्ड रेजिंग एण्ड वाक कार्यक्रम आयोजना गरिएको छ । बाबुप्रपादको बारेमा www.babu4d2.comवाट जानकारी लिन सकिने छ ।
प्रतिक्रिया लेख्नुहोस्:-