‘गुर्खा किचेन’को थप तीनवटा शाखा विस्तार

स्यानफ्रान्सिस्को । अमेरिका

अक्टोवर ८

सन् २०१९ देखि सिलीकोन भ्यालीको सन्निभेलमा संचालनमा आएको ‘गुर्खा किचेन’ले स्थापनाको छोटो अवधिमा सिलिकोन भ्याली आसपासमा थप तीनवटा चेन रेष्टुरेण्ट संचालनमा ल्याउन लागेको छ । नेपाली तथा इण्डियन खानामा प्रसिद्धि कमाएको ‘गुर्खा किचेन’को यो ब्यावसायिक विस्तारलाई नेपाली समुदायमा निकै महत्वपूर्ण मानिएको छ । थप तीन रेष्टुरेण्ट सिलीकोन भ्यालीको महत्वपूर्ण स्थानहरु स्यान रोमोन, हेवर्ड र स्यानहोजेमा संचालन हुने गुर्खा किचेनले जनाएको छ ।

‘गुर्खा किचेन’ले जारी गरेको प्रेस नोटमा छोटो अवधिमा नै रेष्टुरेण्टले ग्राहकहरुवाट आर्जन गरेको विश्वसनीयता, प्रसिद्धि र अथेण्टिक नेपाली तथा इण्डियन परिकारलाई क्यालिफोर्नियाका विभिन्न शहरमा पुर्याउने आफ्नो योजना अनुसार सिलिकोन भ्यालीका तीन स्थानहरुमा रेष्टुरेण्ट विस्तार गर्न लागिएको उल्लेख गरिएको छ ।

‘गुर्खा किचेन’का संचालक एवं प्रमुख सेफ अनिल पन्तले यसअघि नेपालको प्रसिद्ध पांचतारे होटल अन्नपूर्ण र भारतका विभिन्न होटलहरुमा सेफ भएर काम गरेका थिए । पन्त नेपाल एव भारतमा नाम चलेका प्रसिद्ध सेफको रुपमा परिचित छन्  ।  पन्तको पाककलाको कारण पनि गुर्खा किचेनले थोरै अवधिमा गुणात्मक फड्को मारेको बताइन्छ ।

रेष्टुरेण्टका अर्का संचालक नारायण खनालले सन्निभेलमा संचालनमा रहेको गुर्खा किचेनले पाएको सफलता र आफूहरुको अनुभवले नै तीनवटा महत्वपूर्ण स्थानहरुमा रेष्टुरेण्ट संचालनमा ल्याउन संभव भएको बताए । ‘भोलीदेखि स्यानरोमनको शुरु हुन्छ, भोली नै हेवर्डको सांचो पनि लिन्छौ र नोभेम्वरवाट स्यानहोजेमा संचालन गछौं’, खनालले भने-‘अहिलेसम्मको अनुभव र हामीले ग्राहकहरुलाई दिएको सर्भिस र पाएको विश्वासवाट नै यो जमर्काे गरेका हौ’ । खनालले आफूहरुको राम्रो टीम रहेकोले एकैपटक तीन लोकेशनमा रेष्टुरेण्ट संचालनमा ल्याउन संभव भएको बताए ।
अमेरिकनहरु वीच लोकप्रिय रहेको गुर्खा किचेन नेपाली र इण्डियन समुदायमा पनि त्यतिकै लोकप्रिय रहेको छ । संसारमा शाहसिक र बहादुरीको पर्याय बनेको ‘गुर्खा’को नामावाट बनेको यस रेष्टुरेण्ट क्यालिफोर्निया राज्यमा दर्ता भएको छ ।