चार्ल्स शोभराजलाई थुनामुक्त गर्न सर्वोच्चको आदेश

काठमाडौं । सर्वोच्च अदालतले चार्ल्स शोभराजलाई थुनामुक्त गर्न आदेश दिएको छ ।​

विहीबार न्यायाधीशद्वय सपना प्रधान मल्ल र तिलप्रसाद श्रेष्ठको इजलासले उनलाई थुनामुक्त गर्न आदेश दिएको हो । हत्या आरोपमा जेल सजाय पाएका शोभराजले आफूलाई तोकिएको अवधिभन्दा बढी कैद राखिएको भन्दै थुनामुक्त हुन पाउँ भनी निवेदन दिएका थिए।

कर्तव्य ज्यान मुद्दामा फ्रान्सेली नागरिक शोभराजालई भक्तपुर जिल्ला अदालतले जन्मकैदको सजाय सुनाएको थियो। सर्वोच्चले २०६७ साल साउन १४ गते जिल्लाको फैसला सदर गरेको थियो।

२०७४ चैत ८ मा भक्तपुर जिल्ला अदालतले २०८० असोज १ सम्म कैदमा राख्नेगरी संशोधित कैदीपूर्जी दिए पनि उनले १९ वर्ष अर्थात ९५ प्रतिशत कैद भुक्तानी गरिसकेका छन्। उनी उमेरले ७४ वर्ष भइसकेको र मुटुसम्बन्धी रोगबाट पीडित भएको भन्दै बाँकी कैद मिनाहा गरी तत्काल थुनामुक्त गर्न सर्वोच्चले आदेश दिएको हो।